සුකුරුත්තං නංගිගේ කතාව

විචිත්‍ර
සුකුරුත්තං නංගිගේ කතාව

මගේ නංගීගේ නම නංගී ය. මට වඩා බාලය. නංගී ස්තී-රියකි.
තාත්තා ගේ පඩිය භාගයක් වියදම් වන්නේ නංගීටය. ඇගේ හිසට ෂැම්පු ද,
හිස් කබලට තෙල්ද, අතේ හා පයේ අඟිලි විස්සට පාට විස්සක කිවුටෙක්ස් ද ඇත. ඇයට ඇඟිලි විස්සක් තිබුනේ හොඳ වෙලාවටය. බැරි වෙලාවත් හැකරැල්ලෙකුගේ මෙන් ඇයට කකුල් තිබුනා නම් තාත්තාට යන්න වෙන්නේ හොම්බෙන්ය.

 

නංගීගේ මුහුනට එක ක්‍රීම් වර්ගයකි. බෙල්ලට තව එකකි. අතට, කකුලට, බඩට, කටට, පිටට ආදී සකලවිද සර්වාංගයේ සියලු අවයවයන් සඳහා ඇයට ක්‍රීම් වර්ග ඇත.
දිනක් මුහුනේ උලනා ක්‍රීම් වර්ගයක් මට බැරිවී යෝගට් කියා කැවු-නාය. මේ තවමත් දුවන්නේ ඒ බඩේ අමාරුවටය.

 


නංගීට එක එක තැනට එක එක ක්‍රීම් තිබුනද මට ඇත්තේ එකම එක ක්‍රීම් වර්ගයකි. ඒ ෂේවින් ක්රීම්ය. මම හිසේ සිට දෙපතුල දක්වා එය උලාගෙන අහවර වූ පසු නංගී ගේ බේබි ක්‍රීම් ගා රැවුල කපා ගන්නෙමු. නංගී ගේ බේබි ක්‍රීම්එක පසුපසද මාර කතාවක් ඇත. බේබි ක්‍රීම් ගාන්නේ බේබිලාය පුත්තලම් බූරුවන් හත් අට දෙනෙ-කුගේ වයස ඇති නංගී බේබියෙකු වූයේ කෙසේදැයි මම දහ අතේ කල්පනා කලාහුය. අද කාලේ බේබිලා කොතරම් ලොකු දැයි මට අවසානයේදී කල්පනා වී සිහිමුර්ජාවක් ද ඇති විය.

 


අපි කැරට් කෑවාට නංගී කැරට් බොයි. මුං ඇට මුහුනේ ගායි. මී කිරි, දෙහි අලිගැට පේර යනාදී ඕනෑම දෙයක් ඇය මුහුනේ උලයි.
කිටියා වඩාත්ම කැමති නංගී ඇගේ මුහුනේ මී කිරි ගාන-වාටය. එදාට ඇගේ මුහුන සෝදන්නේ කිටියාය.

 


එසේ වුවද තාත්තා දුක් මහන්සියෙන් හරි හම්බකර අපට කන්න ගේන හැම හත්තිලව්වක්ම නංගී මුහුනේ ගායි. දිනක් අම්මා පිපිඤ්ඤා සලාද හැදුවාය. නමුදු එහි පිපිඤ්ඤා තිබුනේ නැත. “කෝ අම්මේ පිපිඤ්ඤා” නංගී ගෙන් ඉල්ල ගන්න…. කාරනාව තේරුනේ එවිටය. බත් එක බෙදාගත් පසු දෙහි, රතුළුණු, අමු මිරිස්, උම්බලකඩ, ඇති මිශ්‍රනයෙන් ටිකක් පිඟානට දමාගෙන නංගි ගේ මුහුනේ සහ ඇස් උඩ ඇති පිපිඤ්ඤා පෙති දෙකක් පිඟානට දමා ගත යුතුය. නංගී දිනපතා සැලුනයට යයි. කලාතුරකින් පාසල් යයි.
සැලුනයට ගොස් මුහුන ස්ට්රේට් කරයි. අතේ පයේ මයිල් ස්මයිල් වනතුරු ෆර්ම් කරයි.
කොන්ඩය බිලීච් කරයි. තොල් රීකන්ඩිශන් කරයි. නංගී ගේ මුහුනේ වලවල් නැත. ඇත්තේ ගොඩැලිය. සැලුනයේ අක්කා නංගී ගේ මුහුනට පොටි දමයි.
අනතුරුව හැටේ වැලිකඩ-සායියෙන් කපා එකසිය විස්සේ වැලිකඩදාසියෙන් ඔප දමයි.
නංගීව කසාද බැන්ද-වීමට අවශ්‍ය දිනක පුවත්-පත්වල පළ කිරීමට සඳහා අවශ්‍ය මංගල දැන්වීම මම දැන්මම ලියා ලැමිනේටින් කරගෙන සිටිමි.


රූමත් ගුණවත් නූගත් දියණියට සුකුරුත්තන් ඉවසිය හැකි,
ගොබ්බ, මෝඩ, බයාදු, විලිබයකින් තොර කෝටිපති ව්‍යාපාරික පුතෙකු අසරණ වූ දෙමාපියන් සොයයි. වැන්දඹු වූවාට කම් නැත. විහිළුවට නොලියන්න, මෙය ජීවිතය සම්භන්ධ බරපතල ගැටලුවකි.
මීට අයියා….


සමන් එදිරිමුණි

මේ ගැන ඔයාගේ අදහස....?
  • නියමයි (29%)
  • සතුටුයි (6%)
  • හිනා යනවා (53%)
  • දුකයි (12%)
  • තරහයි (0%)